'জ্ঞানোন্মেষ' শীৰ্ষক আন্তঃ জিলা ভিত্তিক কুইজ প্ৰতিযোগিতা সম্পন্ন

ডিজিটেল সংবাদ, গোলাঘাটঃ গোলাঘাটৰ কেইজনমান উদীয়মান কুইজপ্ৰেমী কিশোৰ কিশোৰীৰ দ্বাৰা গঠিত এক অনলাইন কুইজ গোট ' জ্ঞানোত্তৰণ' ৰ উদ্যোগত আৰু গোলাঘাট জাতীয় বিদ্যালয়ৰ সহযোগত আজি অনুষ্ঠিত কৰা হয় আন্তঃ জিলা ভিত্তিক এখনি কুইজ প্ৰতিযোগিতা।  গোলাঘাট জাতীয় বিদ্যালয়ৰ যোগেন পুণ্যপ্ৰভা প্ৰেক্ষাগৃহত অনুষ্ঠিত হোৱা এই কুইজ প্ৰতিযোগিতা আনুষ্ঠানিক ভাৱে মুকলি কৰে বিদ্যালয় খনৰ অধ্যক্ষ স্মৃতিৰেখা বৰাই। দ্বাদশ শ্ৰেণীলৈকে মুকলি এই কুইজ প্ৰতিযোগিতাত গোলাঘাটৰ ভিন্ন প্ৰান্তৰ লগতে তিতাবৰ, যোৰহাট, আমগুৰি আদি বিভিন্ন ঠাইৰ পৰা অহা মুঠ ২২ টা দলে অংশগ্ৰহণ কৰে। গোলাঘাটৰ এজন জনপ্ৰিয় কুইজ পৰিচালক শৰৎ চেতিয়াই পৰিচালনা কৰা প্ৰতিযোগিতা খনত প্ৰথম স্থান অধিকাৰ কৰে গোলাঘাট জাতীয় বিদ্যালয়ৰ সুনয়ন গগৈ আৰু হৰ্ষচায়া বৰাৰ দল‌ে,  দ্বিতীয় স্থান দখল কৰে একেখন বিদ্যালয়ৰে  বৰ্ণিল খাটনিয়াৰ আৰু অংকুৰজ্যোতি লাহনৰ দলে।  আনহাতে অৰুণোদয় একাডেমী, আমগুৰিৰ মৃগাংকজ্যোতি বৰুৱা আৰু সত্য সুন্দৰ বৰাৰ দলে তৃতীয় স্থান অধিকাৰ কৰিবলৈ সক্ষম হয়। প্ৰতিযোগিতাত শ্ৰেষ্ঠ দৰ্শকৰ বঁটা লাভ কৰে গোলাঘাটৰ কংকিতা দেৱীয়ে। বিজয়ী প্ৰথম তিনিটা দলক নগদ ধন, মানপত্ৰ আৰু স্মাৰক আগবঢ়োৱা হয়। কুইজ পৰিচালক শৰৎ চেতিয়া, গোলাঘাট জাতীয় বিদ্যালয়ৰ সহকাৰী শিক্ষক গৌতম বৰদলৈ আৰু সিদ্ধাৰ্থ সন্দিকৈয়ে বিজয়ী সকলক বঁটা প্ৰদান কৰে। কাৰ্যসূচী সঞ্চালনা কৰে জ্ঞানোত্তৰণ কুইজ গোটৰ অন্যতম সদস্য কংকনা বৰাই।