৬ ঘণ্টা পাৰ হৈ গ'ল, কিন্তু এতিয়ালৈকে মুকলি কৰি দিয়া নাই সাংবাদিক দিলোৱাৰ হুছেইন মজুমদাৰক

ডিজিটেল ডেস্কঃ বৰ্তমানো আৰক্ষীৰ জিম্মাত সাংবাদিক, গুৱাহাটী প্ৰেছ ক্লাবৰ সহকাৰী সম্পাদক দিলৱাৰ হুছেইন মজুমদাৰক। ৬ ঘণ্টা পাৰ হৈ গ'ল, কিন্তু এতিয়ালৈকে আটক কৰি ৰাখিছে  পাণবজাৰ আৰক্ষীয়ে। সমগ্ৰ ঘটনাক লৈ উদ্বেগ প্ৰকাশ কৰিছে গুৱাহাটী প্ৰেছ ক্লাবে। এপেক্স বেংকৰ কেলেংকাৰীৰ সন্দৰ্ভত বাতৰি সংগ্ৰহৰ বাবেই পাণবজাৰ আৰক্ষীয়ে আটক কৰা স্বয়ং সাংবাদিকগৰাকীয়ে প্ৰকাশ কৰিছে। 

ইফালে আৰক্ষীৰ এই সমগ্ৰ বিষয়টোক লৈ উদ্বেগ প্ৰকাশ কৰিছে গুৱাহাটী প্ৰেছ ক্লাবে। এক প্ৰেছ বিজ্ঞপ্তিত প্ৰেছ ক্লাবে কয়, আজি অসম কো অপাৰেটিভ এপেক্স বেংকত অসম জাতীয় পৰিষদৰ জাতীয় যুৱ বাহিনীৰ প্ৰতিবাদ কাৰ্যসূচীৰ বাতৰি সংগ্ৰহৰ বাবে যোৱা গুৱাহাটী প্ৰেছ ক্লাবৰ সহকাৰী সম্পাদক, জ্যেষ্ঠ সাংবাদিক দিলৱাৰ হুছেইন মজুমদাৰক পাণবজাৰ থানালৈ ফোনযোগে মাতি নি আবদ্ধ কৰি ৰাখে।বৰ্তমানলৈ তেওঁৰ অপৰাধ কি জানিব পৰা হোৱা নাই। ইতিমধ্যে সাংবাদিকগৰাকীক গ্ৰেপ্তাৰ কৰা হৈছে বুলি জনা গৈছে।  বৰ্তমানলৈকে তেওঁৰ লগত কথা পাতিবলৈও দিয়া হোৱা নাই। গুৱাহাটী প্ৰেছ ক্লাবে  বিষয়টোত গভীৰ উদ্বেগ প্ৰকাশ কৰি আৰু অতি সোনকালে মজুমদাৰক মুকলি কৰি দিবলৈ আহ্বান জনাইছে।