বীৰাংগনা সতী সাধনী ৰাজ্যিক বিশ্ববিদ্যালয়ত দুদিনীয়া ৰাষ্ট্ৰীয় কৰ্মশালা সম্পন্ন

ডিজিটেল সংবাদ, গোলাঘাটঃ  গোলাঘাটৰ বীৰাংগনা সতী সাধনী ৰাজ্যিক বিশ্ববিদ্যালয়ৰ সমাজতত্ব বিভাগ আৰু অসমীয়া বিভাগৰ যুটীয়া উদ্যোগত আৰু বিশ্ববিদ্যালয় খনৰ আভ্যন্তৰীণ মান নিৰূপণ কোষ, ৰিচাৰ্চ এণ্ড ডেভেলপমেন্ট কোষৰ সহযোগত দুদিনীয়া ৰাষ্ট্ৰীয় পৰ্যায়ৰ কৰ্মশালা অনুষ্ঠিত কৰা হয়।  যোৱা ১৯ আৰু ২০ মাৰ্চত অনুষ্ঠিত এই ৰাষ্ট্ৰীয় কৰ্মশালাখন মুকলি কৰে বিশ্ববিদ্যালয় খনৰ উপাচাৰ্য প্ৰাধ্যাপক জি চিংগায়াই। মূলতঃ সাম্প্ৰতিক পটভূমিত সমাজ বিজ্ঞানৰ গৱেষণাৰ ধাৰা আৰু সম্ভাৱনীয়তা সন্দৰ্ভত আলোকপাত কৰা এই কৰ্মশালাত আদৰণি ভাষণ প্ৰদান কৰে বীৰাংগনা সতী সাধনী ৰাজ্যিক বিশ্ববিদ্যালয়ৰ সমাজতত্ব বিভাগৰ ভাৰপ্ৰাপ্ত মুৰব্বী অধ্যাপক ড০ পাৰ্থ প্ৰতীম দত্তই। ৰাজ্যৰ  তিনি বিশিষ্ট শিক্ষাবিদ ক্ৰমে তেজপুৰ বিশ্ববিদ্যালয়ৰ প্ৰাধ্যাপক ৰবীন ডেকা আৰু প্ৰাধ্যাপক অমিয় কুমাৰ দাস আৰু ডিব্ৰুগড় বিশ্ববিদ্যালয়ৰ প্ৰাধ্যাপক মৃদুল বৰদলৈয়ে সমল ব্যক্তি হিচাপে উপস্থিত থাকি বিষয়বস্তুৰ ওপৰত যথেষ্ট  তথ্যসমৃদ্ধ আৰু সাৱলীল বক্তব্য আগবঢ়ায়। কৰ্মশালা খনিৰ কাৰিকৰী দিশত নেতৃত্ব দিয়ে ক্ৰমে অসম বিশ্ববিদ্যালয়ৰ ড০ প্ৰফুল্ল কুমাৰ নাথ,  ডিব্ৰুগড় বিশ্ববিদ্যালয়ৰ ড০ কুহেলী দাস ,উদ্যোক্তা সতী সাধনী ৰাজ্যিক বিশ্ববিদ্যালয়ৰ ড০ দেৱভূষণ বৰা, দেৱীচৰণ বৰুৱা মহাবিদ্যালয়ৰ ড০ ৰঞ্জন ভট্টাচাৰ্য আৰু চৰকাৰী মডেল কলেজ দেওথৰৰ  ড০ হৃদয় ৰঞ্জন কলিতাই। অসমৰ লগতে ভাৰতবৰ্ষৰ বিভিন্ন প্ৰান্তৰ মহাবিদ্যালয় আৰু বিশ্ববিদ্যালয়ৰ পৰা অংশগ্ৰহণ কৰা মুঠ ৪২ জন গৱেষকে কৰ্মশালাত নিজৰ গৱেষণা পত্ৰ প্ৰদান কৰে। বীৰাংগনা সতী সাধনী ৰাজ্যিক বিশ্ববিদ্যালয়ৰ সমাজতত্ব বিভাগৰ ড০ পাৰ্থ প্ৰতীম বৰা,  ড০ তপন শইকীয়া আৰু চফিউল আলম পাঠান আৰু অসমীয়া বিভাগৰ ড০ পৰিস্মীতা হাজৰিকাই সঞ্চালনা কৰা দুদিনীয়া এই ৰাষ্ট্ৰীয় পৰ্য্যায়ৰ কৰ্মশালাত দুয়োটা বিভাগৰ যথেষ্ট সংখ্যক ছাত্ৰ ছাত্ৰীৰ উপস্থিতি দেখি গৱেষক সকলে সন্তুষ্টি প্ৰকাশ কৰে।