গুজৰাটত সংঘটিত পথ দুৰ্ঘটনাত গোলাঘাটৰ যুৱতীৰ কৰুণ মৃত্যু

গোলাঘাট,  ২০ মাৰ্চ : গুজৰাটৰ ৰাজধানী চহৰ আহমেদাবাদৰ গৌটা দলঙত সংঘটিত এক শোকাৱহ পথ দুৰ্ঘটনাত গোলাঘাটৰ এগৰাকী মেধাৱী যুৱতীয়ে প্ৰাণ হেৰুওৱাৰ ঘটনাই গোলাঘাট নগৰত শোকৰ ছাঁ পেলাইছে। জানিব পৰা মতে গোলাঘাট নগৰৰ বিশিষ্ট ব্যৱসায়ী তথা ইউনাইটেড চেম্বাৰ অৱ কমাৰ্চ গোলাঘাটৰ সম্পাদক পৱন বাহেটি আৰু সুনীতা বাহেটিৰ কন্যা টিশা বাহেটিয়ে যোৱা নিশা এখন ৰেপিড' সেৱাৰ বাইকত গৈ থকা অৱস্থাত আহমেদাবাদৰ গৌটা দলঙত এক পথ দুৰ্ঘটনাত পতিত হৈ গুৰুতৰভাৱে আঘাতপ্ৰাপ্ত হয়। পৰৱৰ্তী সময়ত তেওঁক স্থানীয় চিকিৎসালয়লৈ নিয়া হয় যদিও মূৰত গুৰুতৰ আঘাত পোৱাৰ ফলত চিকিৎসালয়তে টিশা বাহেটিয়ে মৃত্যুক আঁকোৱালি লয়। সৰুৰে পৰা অতি মেধাৱী টিশা বাহেটিয়ে মাত্ৰ ২২ বছৰ বয়সতে ইণ্টেৰিয়ৰ ডিজাইনাৰ হিচাপে গুজৰাটৰ এটা প্ৰতিষ্ঠিত কোম্পানীত কাম কৰিবলৈ সুযোগ লাভ কৰিছিল। যোৱা নিশা কৰ্তব্যস্থলীৰ পৰা উভতি আহোঁতে এই শোকাৱহ ঘটনা সংঘটিত হয়।  ঘটনাটোত ৰেপিড' চালকজনো গুৰুতৰ ভাৱে আহত হয়।