'কাৰাগাৰলৈ ভয় নকৰে': আবকাৰী নীতি গোচৰৰ চিবিআই তদন্তসন্দৰ্ভত মনীষ চিছোদিয়া

 

দেওবাৰে দিল্লীৰ আবকাৰী গোচৰৰ তদন্ত সংস্থাৰ দ্বাৰা সোধা-পোছা কৰিব লগা কেন্দ্ৰীয় অনুসন্ধান ব্যুৰো (চিবিআই)ৰ সন্মুখত দিল্লীৰ উপ মুখ্যমন্ত্ৰী মনীষ চিছোদিয়াৰ উপস্থিতিৰ পূৰ্বে দিল্লীৰ মুখ্যমন্ত্ৰী অৰবিন্দ কেজৰিৱালে চিছোদিয়াক ফেডাৰেল এজেঞ্চীয়ে গ্ৰেপ্তাৰ কৰিব পাৰে বুলি আশংকা ব্যক্ত কৰিছিল। এই সন্দৰ্ভত মুখ্যমন্ত্ৰী কেজৰিৱালে মনীষ চিছোদিয়াক উদ্দেশ্যি টুইটত কৰিছিল এনেদৰে- ‘‘দেশ আৰু সমাজৰ বাবে কৰা হ'লে কাৰাগাৰ লৈ যোৱাটো গৌৰৱ। ঈশ্বৰ আপোনাৰ সৈতে আছে মনীষ। লাখ লাখ শিশু আৰু তেওঁলোকৰ পিতৃ-মাতৃৰ আশীৰ্বাদ আপোনাৰ সৈতে আছে। যেতিয়া আপুনি দেশ আৰু সমাজৰ বাবে কাৰাগাৰলৈ যায়, তেতিয়া কাৰাগাৰলৈ যোৱাটো অভিশাপ নহয়, ই এক গৌৰৱ। মই ভগৱানৰ ওচৰত প্ৰাৰ্থনা কৰোঁ যে আপুনি সোনকালে কাৰাগাৰৰ পৰা উভতি আহক। শিশু, অভিভাৱক আৰু আমি সকলোৱে আপোনাৰ বাবে অপেক্ষা কৰিম’’।

আবকাৰী নীতিৰ গোচৰত অভিযুক্ত চিছোদিয়াক এক নতুন চমনত চিবিআইয়ে তেওঁক দেওবাৰে  সোধা-পোছাৰ বাবে সংস্থাটোৰ সন্মুখত হাজিৰ হ'বলৈ কৈছিল। ফেডাৰেল সংস্থাটোৱে আগতে উপ মুখ্যমন্ত্ৰীক দেওবাৰে তদন্তত যোগদান কৰিবলৈ কৈছিল কিন্তু তেওঁ দিল্লী চৰকাৰৰ বাজেট প্ৰস্তুতিৰ কথা উল্লেখ কৰি অধিক সময় বিচাৰিছিল।  চিছোদিয়াই দাবী কৰিছিল যে তেওঁ কেইমাহমান কাৰাগাৰত থাকিব লগা হ'লে তেওঁ গুৰুত্ব নিদিয়ে। আকৌ এবাৰ অভিযোগসমূহক (আবকাৰী নীতিত অনিয়ম আৰু দুৰ্নীতিৰ) মিছা বুলি অভিহিত কৰি চিছোদিয়াই কয়, "মই ভগত সিঙৰ অনুগামী যাক দেশৰ বাবে ফাঁচী দিয়া হৈছিল। এনে মিছা অভিযোগৰ বাবে কাৰাগাৰলৈ যোৱাটো এটা সৰু কথা।"

"আজি পুনৰ চিবিআইলৈ গৈ সমগ্ৰ তদন্তত সম্পূৰ্ণ সহযোগিতা আগবঢ়াব। লাখ লাখ শিশুৰ মৰম আৰু কোটি কোটি দেশবাসীৰ আশীৰ্বাদ আমাৰ লগত আছে। মই কেইমাহমান কাৰাগাৰত থাকিব লগা হ'লে মই গুৰুত্ব নিদিওঁ।" চিছোদিয়াই দেওবাৰে পুৱাই টুইটাৰত লিখিছিল এইদৰে। 

চিছোদিয়াৰ টুইটৰ উত্তৰত দিল্লী ভাৰতীয় জনতা পাৰ্টীৰ (বিজেপি) মুখপাত্ৰ হৰিশ খুৰানাই কয় যে ভগত সিঙে দেশৰ স্বাধীনতাৰ বাবে কাৰাগাৰলৈ গৈছিল, আৰু "মনীষ চিছোদিয়া আজি কাৰাগাৰলৈ গ'লে দুৰ্নীতিৰ বাবে কাৰাগাৰলৈ যাব।"তেওঁ লগতে কয়, "সেয়েহে চিছোদিয়াই ভগত সিঙৰ নাম লোৱা উচিত নহয়। যদি তেওঁ কোনো দুৰ্নীতি কৰা নাই, চিছোদিয়া আৰু আপৰ নেতাসকল কিয় ভয় খাইছে? আপৰ নেতাসকল আতংকিত অৱস্থাত আছে যিয়ে বুজায় যে কিবা ভুল হৈছে," খুৰানাই কয়।

ইফালে, আপৰ কৰ্মী আৰু সমৰ্থকসকলক একত্ৰিত হোৱাত বাধা দিবলৈ চিছোদিয়াৰ মথুৰা ৰোডৰ বাসগৃহৰ বাহিৰত বৃহৎ সংখ্যক নিৰাপত্তা বাহিনী মোতায়েন কৰা হৈছে।

উল্লেখ্য যে চিছোদিয়া  দিল্লী চৰকাৰৰ আবকাৰী, শিক্ষা আৰু বিত্ত মন্ত্ৰী। তেওঁ ২০২১ চনৰ নৱেম্বৰত প্ৰৱৰ্তন কৰা ২০২১-২২ আবকাৰী নীতিৰ পৰিচালনা কৰিছিল।এই নীতিয়ে ৰাজধানীৰ সুৰাৰ বজাৰখন আমূল পৰিৱৰ্তন কৰে আৰু ৰাজ্য চৰকাৰে ৮,৯১৯.৫৯ কোটি লাভ কৰে। যি অনুজ্ঞাপত্ৰৰ নিবিদাৰ বাবে নিৰ্ধাৰিত আধাৰ মূল্যতকৈ প্ৰায় ২৭% অধিক। ইয়াৰ উদ্দেশ্য আছিল সুৰা ক্ৰয়ৰ প্ৰক্ৰিয়াটো অধিক উপভোক্তা-অনুকূল কৰি তোলা কিন্তু ইয়াৰ পৰিৱৰ্তে হাজাৰ হাজাৰ কোটি টকাৰ অপ্ৰত্যাশিত আবকাৰী ৰাজহ লোকচান হয়।

অৱশ্যে, গোচৰটোত এতিয়ালৈকে দাখিল কৰা তিনিখন পৃথক অভিযোগপত্ৰত চিছোদিয়াৰ নাম উল্লেখ কৰা হোৱা নাই।